మామూలుగా చిరంజీవి యాక్షన్‌ చెబితే చిరు నటించాలి. కానీ ఇప్పుడు రివర్స్‌ అయ్యింది. వినాయక్‌ డైరెక్షన్‌లో చిరంజీవి 150వ సినిమా 'ఖైదీ నెం 150' తెరకెక్కుతున్న సంగతి తెలిసిందే. అయితే ఈ సినిమాలో వినాయక్‌ ఓ చిన్న రోల్‌లో కనిపిస్తాడట. ఆ సీన్‌కి చిరంజీవి డైరెక్షన్‌ చేస్తున్నారట. గతంలో 'ఠాగూర్‌' సినిమాలో కూడా ఓ సీన్‌లో వినాయక్‌ ప్రత్యక్షమవుతాడు. అలాగే ఓ కీలక సన్నివేశంలో ఈ సినిమాలో కూడా వినాయక్‌ తళుక్కుమని మెరుస్తాడు. చిరు డైరెక్షన్‌లో నటించే అరుదైన అవకాశం తనకి మాత్రమే దక్కిందంటూ ఆనందంతో ఉబ్బితబ్బిబ్బై పోతున్నాడు. 'ఠాగూర్‌' సినిమా పెద్ద విజయం సాధించడంతో, ఆ సెంటిమెంట్‌ని చిరంజీవి ఫాలో అవుతున్నారని అనుకోవచ్చు.
సంక్రాంతికి ఈ సినిమా విడుదల కానుంది. షూటింగ్‌ చివరి దశకు చేరుకుంది. కాజల్‌ అగర్వాల్‌ ఈ సినిమాలో హీరోయిన్‌గా నటిస్తోంది. హీరోగా సెటిలైన తర్వాత సునీల్‌ తొలిసారిగా ఈ సినిమాతో మళ్లీ కామెడియన్‌గా గెటప్‌ మార్చనున్నాడు. దేవిశ్రీ ప్రసాద్‌ మ్యూజిక్‌లో ఈ సినిమా పాటలు అదిరిపోనున్నాయి. ఈ నెల్లోనే ఈ సినిమా పాటలు విడుదల కానున్నాయి. విజయవాడలో ఈ సినిమా పాటల ఆవిష్కరణ కార్యక్రమాన్ని ఘనంగా నిర్వహించే యోచనలో ఉన్నారట. అన్నట్లు చిరంజీవి 151వ సినిమా కూడా సంక్రాంతికి పట్టాలెక్కే అవకాశాలున్నాయని తెలుస్తోంది. సురేందర్‌ రెడ్డి డైరెక్షన్‌లో ఈ సినిమా తెరకెక్కే అవకాశాలు దాదాపు ఖరారైనట్లే అని సమాచారమ్‌.
|
