నవ్వుల జల్లు - జయదేవ్

లంక పౌరుడు - 214: కుంభకర్ణుల వారిని నిద్ర లేపడానికి లలిత సంగీత గోష్టి వెళుతున్నదే?
లంక పౌరుడు - 412: ఆయన కోసం కాదు! ఆయన్ని లేపడానికి ప్రయత్నించి, అలిసి పోయిన భటుల్ని ఉత్తేజపరచడానికి!

బృహన్నల: అన్నా... నువ్వు కీచకుడిని వధించావట కదా?
భీముడు: వాడి కాళ్ళూ చేతులని, ములక్కాడలని విరిచేలా విరిచి, వాడ్ని, అల్లం, వెల్లుల్ని రోట్లో దంచేలా దంచి, నుజ్జు నుజ్జు చేసి పారేసాను!
 బృహన్నల: నీ పాక శాస్త్ర ప్రావీణ్యాన్ని పోగొట్టుకున్నావ్ కాదన్నా!

మహామంత్రి: మహారాజా! పొరుగుదేశం నుంచి ఈ కపోతం వార్త మోసుకొచ్చింది!
మహారాజు: ఈ రోజు దీనితో సరిపెట్టుకుంటాం, రేపటికి బాగా బలిసిన పావురాన్ని పంపించమని, తక్షణం బదులు రాయి!!

పరిచారిక: మహారాణీ! రాజు గారు ఉద్యానవనం లో రహస్యంగా మద్యం సేవిస్తున్నారు!
మహారాణి: వారు సేవిస్తున్నది ఫల రసం ఎందుకు కాకూడదు? మద్యమనే నని ఎలా చెప్పగలవ్?
పరిచారిక: ఆ మద్యం పోసింది నేనే నమ్మా!
మహారాణి: ఎవరక్కడ? చాడీలు చెప్పే ఈ పరిచారికని బంధించి కారాగృహంలో తోయండి!!

అస్త్ర శస్త్ర నిపుణుడు:  రాకుమారా, మీరు ప్రయోగించింది ఆగ్నేయాస్త్రం! అది పడిన చోట, అన్నీ దగ్ధమైపోతాయి! వెంటనే వెనక్కి లాక్కోండి
రాకుమారుడు: మాకు ఇవ్వడమే గానీ, పుచ్చుకోవడం మేమేరుగం!