రెబల్ స్టార్ కృష్ణంరాజు ప్రధాన పాత్రలో వచ్చిన ‘తాండ్ర పాపారాయుడు’ సినిమా అప్పట్లో ఘనవిజయం సాధించింది. దాసరి నారాయణరావు దర్శకత్వంలో వచ్చిందీ సినిమా. కృష్ణంరాజు నట విశ్వరూపం ఈ సినిమాలో చూడొచ్చు. అదలా వుంటే, రెబల్ స్టార్ కృష్ణంరాజు నట వారసుడు ప్రభాస్, ‘బాహుబలి’ సినిమాలో నటిస్తున్న విషయం విదితమే. ‘బాహుబలి’ సినిమాలో ప్రభాస్ నట విశ్వరూపం చూస్తారని సినీ పరిశ్రమలో అందరూ అనుకుంటున్నారు.
రాజమౌళి ప్రతిష్టాత్మకంగా తెరకెక్కిస్తోన్న ఈ సినిమా కోసం ప్రభాస్ చాలా కష్టపడ్తున్నాడు. గుర్రపు స్వారీ, కత్తి ఫైటింగులు గట్రా నేర్చుకుంటున్న ప్రభాస్, ఈ సినిమాపై చాలా ఆశలే పెట్టుకున్నాడు. తెలుగు సినీ పరిశ్రమ గర్వించదగ్గ దర్శకుడిగా తన సినిమాలతో తన ప్రతిభను చాటుకున్న రాజమౌళి, ‘బాహుబలి’ టెక్నికల్ అద్భుతంగా తెరకెక్కించేందుకు ప్రయత్నిస్తున్నాడు.
ఆల్రెడీ ప్రభాస్, రాజమౌళి కాంబినేషన్లో ‘ఛత్రపతి’ రావడం, ఆ సినిమా ఘనవిజయం సాధించడం అందరికీ తెలుసు. అందుకే వీరిద్దరి కాంబినేషన్లో వస్తున్న ‘బాహుబలి’పై భారీ అంచనాలు నెలకొన్నాయి. రెబల్ స్టార్కి ‘తాండ్రపాపారాయుడు’లా, ప్రభాస్కి ‘బాహుబలి’ కెరీర్ లో మైల్ స్టోన్ గా నిలిచిపోతుందని వేరే చెప్పక్కర్లేదు.
|