అవార్డులంటే అస‌హ్యం : విశాల్

రంగు నలుపు... బెరుకు చూపులు. పక్కింటి కుర్రాడు అని చెప్పుకోలేం. అలాగని హీరో అంటే ఒప్పుకోలేం. జాతకం బాగుండి హీరో అయిపోయాడేమో..!  కానీ తెరపై అతన్ని చూస్తే - ఇంకాస్త రంగు పూస్తే ఎక్కడ ఉండేవాడో అనిపిస్తుంది. వాడు - వీడులో అతని నటన చూస్తే.. మన తెలుగబ్బాయి వీడు అని గర్వంగా చెప్పుకోవాలని అనిపిస్తుంది. ఆ వాడు.. విశాల్. పందెం కోడి, పొగరు. శాల్యుట్ - ఈ సినిమా ఫలితాలను పక్కన పెడితే, ఏదో కొత్తగా ట్రై చేద్దాం అనే తపన తప్పకుండా కనిపిస్తుంది. అదే విశాల్ కి ఓ ప్రత్యేక మైన స్థానాన్ని కల్పించింది. ఇప్పుడు పల్నాడు ప్రచార చిత్రం చూసినా అదే భావన. పల్నాడు నవంబరు 2న విడుదల కాబోతోంది. ఈ సందర్భంగా మన తెలుగు అబ్బాయి విశాల్ తో ముఖాముఖి ఇది...
 

మరీ కొత్తదనం కోరుకొంటే ఫలితం వాడు వీడులా తయారవుతుందేమో..?

- అలాంటి సినిమా నా కెరీర్ లో ఒకటుంది అని గర్వంగా ఇప్పటికీ చెప్పుకొంటుంటా. నాకు అన్నివిధాలా సంతృప్తి ఇచ్చిన సినిమా అది. డబ్బులు తీసుకొచ్చే సినిమాలు చాలా ఉంటాయి. కానీ మానసిక సంతృప్తి ఇచ్చేవి కూడా కావాలి కదా.?

 

వాడు వీడు సినిమాకి అవార్డులు రాలేదని ఎప్పుడైనా బాధ పడ్డారా?

- ఛ... ఛ.. అలాంటిదేం లేదు. నిజానికి నాకు అవార్డులన్నా, అవార్డు కార్యక్రమాలన్నా అసహ్యం. నలుగురు కూర్చుని అవార్డుని ఎలా నిర్ణయిస్తారు?  థియేటర్లో వేలాది ప్రేక్షకులు కొట్టే చప్పట్లే నాకు ముఖ్యం.

 

ఇన్నాళ్ల కెరీర్ మీకు ఏం నేర్పింది?

- నేనేం నేర్చుకోలేదు. ఇంకా ఆ ప్రయత్నాల్లోనే ఉన్నా.

 

నిర్మాతగా ఎందుకు మారాల్సివచ్చింది?

- ఏ వ్యాపారానికైనా ప్లానింగ్ కావాలి. ముఖ్యంగా సినిమావాళ్లకు మరీనూ. సినిమా ఎప్పుడు విడుదల చేయాలి?  ఎన్ని థియేటర్లలో విడుదల చేయాలి అనే విషయాలపై నిర్మాతలకు ఓ అవగాహన ఉండాలి. కథ బాలేనప్పుడో, మేమంతా సరిగా పనిచేయనప్పుడో సినిమా సరిగా ఆడకపోతే.. ఓకే. కానీ సరైన సమయంలో సినిమా విడుదల చేయకపోవడం వల్ల ఆ సినిమా ఫ్లాప్ అయితే..?  అది ఎంత మందికి నష్టం?  నేను  చేయని తప్పుకు ఫలితం అనుభవించాలా?  నా విషయంలో అలాంటి పొరపాట్లు జరిగాయి. పల్నాడు కథ ఓ నిర్మాతకు వినిపించాం. తీద్దాం, తీద్దాం అని వాయిదా వేస్తూ వచ్చాడు. నాకు కోపం వచ్చి నిర్మాత అయ్యాను. తెరపై నిర్మాతగా నా పేరు చూసుకొని చాలా సంతోషపడ్డా.

 

మరి దర్శకత్వం ఎప్పుడు?

- దర్శకుడిని కావాలన్నది నా కల. అనుకోకుండా హీరో అయ్యాను. కానీ ఏదో ఒక రోజు మెగాఫోన్ పట్టుకొని తీరతా.

 

మరి కథలు సిద్ధం చేసుకొన్నారా?  అందులో హీరో ఎవరు?

- కథలు ఉన్నాయి. వాటికి నేను సరిపోతానా, లేదా అనేది చూసుకోవాలి.

 

తెలుగులో సినిమా ఎందుకు చేయడం లేదు?

- చేయాలని ఎప్పటి నుంచో అనుకొంటున్నా. కానీ కుదరడం లేదు. ఇప్పుడు ఆ అవకాశం వచ్చింది. శశి నాకోసం ఓ కథ రెడీ చేశాడు. త్వరలోనే సెట్స్ పైకి వెళ్లనుంది.

 

తెలుగు సినిమాలు చూస్తున్నారా?

- సినిమా నా ప్రాణమండీ. తెలుగు సినిమాలు చూస్తూ పెరిగాను. ఇక్కడి కథానాయకుల్లో అందరూ నాకు ఇష్టమే.