వైవిధ్యభరితమైన సినిమాల్ని ఎంచుకుంటూ కెరీర్‌లో మంచి దూకుడు ప్రదర్శిస్తున్నాడు యంగ్‌ హీరో నిఖిల్‌ సిద్దార్ధ. నిఖిల్‌ తాజా సినిమా 'ఎక్కడికి పోతావు చిన్నవాడా' బాక్సాఫీస్‌ వద్ద మంచి విజయాన్ని సాధించింది. 500, 1000 నోట్ల రద్దు తరువాత ఏర్పడ్డ కరెన్సీ సంక్షోభంలోనూ ఈ సినిమా సంచలన విజయాన్ని సాధించడం సినీ వర్గాల్నీ ఆశ్చర్యంలో ముంచెత్తుతోంది. ఇప్పటికే నిఖిల్‌ కెరీర్‌లో బిగ్గెస్ట్‌ హిట్‌ అనే మార్క్‌ని చేరుకున్న 'ఎక్కడికి పోతావు చిన్నవాడా' ఇంకా మరింత పెద్ద విజయం సాధించేందుకు పరుగులు పెడుతోంది.
తెలుగు రాష్ట్రాల్లో ఈ సినిమా మంచి టాక్‌ని సొంతం చేసుకోగా, విదేశాల్లోనూ అబ్బురపరచే కలెక్షన్లు వస్తుండడంతో చిత్ర యూనిట్‌ ఆనందానికి అవధుల్లేకుండా పోతున్నాయి. కష్టపడితే మంచి విజయాన్ని అందుకోవచ్చని ఈ చిత్రం మరోసారి నిరూపించింది. థ్రిల్లర్‌ సినిమాకి కామెడీ టచ్‌ ఇస్తే గ్యారంటీ హిట్‌ అనే భావన టాలీవుడ్‌లో ఉంది. దానికి ఈ చిత్రం ఇంకో చక్కటి ఉదాహరణగా నిలిచింది. కథలతో ప్రయోగాలు చేస్తూనే, ఆ ప్రయోగంలోనూ ఎంటర్‌టైన్‌మెంట్‌ని చూసుకోవడం ద్వారా నిఖిల్‌ సక్సెస్‌ల మీద సక్సెస్‌ సాధిస్తున్నాడు. ఈ తరహా సినిమాలకి నిఖిల్‌ బిగ్గెస్ట్‌ హీరో అనే భావన ఇండస్ట్రీలో నెలకొంటోంది. ఏం చేసినా ప్రేక్షకుల్ని రంజింపజేయడానికేననీ, తమ ప్రయత్నాలు వరుసగా విజయవంతమవుతుండడం చాలా ఆనందంగా ఉందని 'ఎక్కడికి పోతావు చిన్నవాడా' సక్సెస్‌పై నిఖిల్‌ తన ఆనందాన్ని వ్యక్తం చేశాడు.
|
