ఎక్కడ పోయిందో అక్కడే వెతుక్కోమంటారు పెద్దలు. శ్రుతిహాసన్ అదే పనిచేసింది. పరాజయాలు పలకరించిన చోట... విజయపు తీపి కూడా రుచి చూసింది. హిందీలో తొలి సినిమా లక్. అది ఫ్లాప్. తెలుగులో తొలి అడుగు అనగనగా ఓ ధీరుడుతో తడబడింది. ఐరెన్ లెగ్ అనే ముద్ర పడిపోవడానికి అంతకంటే ఇంకేం కావాలి. కానీ శ్రుతి బెదిరిపోలేదు. కృంగిపోలేదు. ఓడిన చోటే గెలిచింది. తెలుగులోనూ, బాలీవుడ్లోనూ తన స్టామినా చూపించుకొంది. గోల్డెన్ లెగ్గా కీర్తి తెచ్చుకొంది. అయితే... ఈ విజయాలేం ఊరకే రాలేదు. దాని కోసం చాలా కష్టపడింది. అయితేనేం... ఇప్పుడా ప్రతిఫలం అనుభవిస్తోంది. ఎవడు సినిమాతో ఈ యేడాది తొలి విజయాన్ని తన ఖాతాలో వేసుకొంది. ఈ సందర్భంగా శ్రుతిహాసన్ తో మాటల ముచ్చట్లు ఇవీ...
* కొత్త యేడాదికి విజయంతో శ్రీకారం చుట్టారు... కంగ్రాట్స్.
- థ్యాంక్సండీ. నిజంగా ఇది గుడ్ బిగినింగ్. ఇలాంటి కమర్షియల్ విజయం ఎవ్వరికైనా మంచి కిక్ ఇస్తుంది. నిజం చెప్పాలంటే టీమ్ అంతా ఈ మూమెంట్ కోసమే చాలాకాలం నుంచి ఎదురుచూస్తోంది.
* ఈ సినిమా వ్యక్తిగతం మీకెంత ప్లస్..?
- ఓ సినిమా ఫ్లాప్ అయితే కథానాయికనూ బాధ్యురాలిని చేస్తారు కదా..? అలానే హిట్ కొడితే మా వాటా మాకొస్తుంది. అందుకే ఈ సినిమా నాక్కూడా ప్లస్సే.
* సెకండాఫ్కే పరిమితమైపోయారు కదా..?
- కథ అలాంటిది. అయినా సినిమా అంతా నేనే కనిపించాలన్న నియమం ఎప్పుడూ పెట్టుకోలేదు. అలాగైతే రామయ్యా వస్తావయ్యాలో అతిథి పాత్రలో కనిపిస్తానా..?
* ఆ సినిమా మీకు చేదు అనుభవాన్ని మిగిల్చింది కదా..?
- అవును. కాకపోతే మంచి ప్రయత్నమే చేశాం. ఆ తృప్తి ఉంది.
* వరుసగా మెగా హీరోలతోనే జత కడుతున్నారు. ఏమిటి కథ...
- కథానాయకుడిని ఎంచుకొనే సౌలభ్యం నాకు లేదండీ. అది దర్శక నిర్మాతల పని. అయినా ముందు హీరోని అనుకొనే కదా, ఆ తరవాత కథానాయికను ఎంచుకొనేది. అయినా పవన్, చరణ్, బన్నీ స్టార్ హీరోలు. వీళ్లతో నటించాలని ఎవరికి ఉండదు చెప్పండి.?
* అదే ఛాయిస్ మీకిస్తే ఏ హీరోని ఎంచుకొంటారు..?
- చాలా సీక్రెట్... నేను చెప్పకూడదు.
* ఇంతకీ ఎలా ఉంది కెరియర్
- చాలా బాగుంది. ఎవ్వరికైనా అడుగుపెట్టగానే విజయాలు వచ్చేయవు. నిరీక్షించాలి. నేను ఆ పనే చేశా. మంచి కథలు, మంచి దర్శకులు.. ఇవి వచ్చే వరకూ ఓపిగ్గా ఉండాలి. అన్నీ మనం అనుకొన్నట్టే జరగవు. గబ్బర్సింగ్లాంటి సినిమా రావడానికి నేనెంత నిరీక్షించానో..!
* తెలుగు, తమిళం, హిందీ... మూడు పడవల ప్రయాణం చేస్తున్నారు. కష్టం అనిపించడం లేదా?
- ఎందుకనిపిస్తుంది. నాకు షూటింగ్ లేకపోతే బోర్. పొద్దున్న లేచినప్పుడు నాచేతినిండా పని ఉండాలి. ఖాళీగా కూర్చోవడం నాకు ఏమాత్రం ఇష్టం లేదు. అతి తెలుగు సినిమానా, మలయాళమా అనే తేడా చూడను.
* కమల్ కూతురు కదా. ఆ ఒత్తిడి ఎలా అధిగమిస్తున్నారు?
- కమల్ కూతురైతే ఏంటి? బయటవాళ్లకూ నాకూ ఏదో తేడా ఉందనుకోను. ఎవరికి వాళ్లు నిరూపించుకోవాలిక్కడ. కమల్ కూతురు కదా అనే గుదిబండ నేనెప్పుడో దించేసుకొన్నాను. శ్రుతిని శ్రుతిలానే చూడండి.
* సరిగమలు ఎప్పుడు పలికిస్తారు?
- దాన్నిఎప్పుడూ వదులుకోను. మ్యూజిక్ నా ప్యాషన్. అయితే ఇంకొంచెం సమయం ఉంది. కొన్నాళ్లు సినిమాలు పక్కన పెట్టి సంగీతంపై దృష్టిసారిస్తా.
* దర్శకత్వం కూడానా..?
- అమ్మో అది చాలా పెద్ద బాధ్యత. నేనంత బరువు మోయలేను
* తరవాతి సినిమాలేంటి?
- రేసుగుర్రంలో నటిస్తున్నా. గబ్బర్లో కథానాయికనేనే. అదికాకుండా వెల్కమ్కి సీక్వెల్ తీస్తున్నారు.
* ఓకే... ఆల్ ది బెస్ట్
- థ్యాంక్యూ.
|