హరివిల్లు - నండూరి సుందరీ నాగమణి

నీ ఊహ ఊదా రంగును సంతరించుకొని...
నాలో తీయని ఊపిరైన వేళ...

నీలిరంగు ఆకాశంలా నా మనసు
నీ తలపుల రంగును అడ్డుకున్న వేళ...

నీలిమ నింపుకున్న నా కురులు...
నీ పైని చిలిపి ఆలోచనల్లా ఊగుతున్న వేళ...

మన వలపుల పచ్చదనం...
హృదయక్షేత్రంలో మమతల పైరులైన వేళ...

పసుపు పోసిన గడపంత పవిత్రంగా...
మన పరిణయం జరిగిన శుభవేళ...

నారింజ రంగు ఉదయ సంధ్యలు
మన ప్రభాతాన్ని వెచ్చగా తడిమిన వేళ...

ఎరుపు రంగు సిగ్గు నిగ్గై బుగ్గల్లో చేరి...
మన రేపటి జీవితశోభలు పండించేవేళ...

ఎప్పటికీ వెలియని ఏడురంగుల ఇంద్ర ధనువై...
మన దాంపత్యం... జీవిత గగనంలో...
ఇలా నిలిచిపోయింది శాశ్వత ప్రేమ చిహ్నమై...