శీర్షిక: ఆర్తి డోగ్రా: ఆత్మవిశ్వాస శిఖరం.. ఆశయాల ఆకాశం శరీర ఆకృతిని చూసి హేళన చేసిన సమాజం.. ఆమె మేధస్సు ముందు శిరస్సు వంచి నమస్కరిస్తోంది. మూడున్నర అడుగుల వామనుడి రూపం ఆమెది. కానీ! అడుగులు మాత్రం ఆకాశాన్ని తాకే విక్రమార్కుడి ఆత్మవిశ్వాసం ఆమె సొంతం. ఆమే జాతీయ పురస్కార గ్రహీత, అజేయమైన సంకల్పబలంతో ఐఏఎస్ (IAS) అధికారిణిగా ఎదిగిన ఆర్తి డోగ్రా. //ప్రతికూలతపై ప్రచండ విజయం// ఆర్తి డోగ్రా పుట్టినప్పుడు, ఆమె భౌతిక స్థితిని చూసి "ఈమె సాధారణ పిల్లలతో కలవలేదు" అని వైద్యులే పెదవి విరిచారు. కానీ, ఆమె తల్లిదండ్రులు కల్నల్ రాజేంద్ర డోగ్రా, కుంకుమ్ డోగ్రా గార్లు ఆ మాటలను లెక్కచేయలేదు. వైకల్యం శరీరానికే కానీ! ఆలోచనలకు కాదని నమ్మి, ఆమెను సామాన్యుల పాఠశాలకే పంపారు. ఆ నమ్మకమే నేడు ఆమెను దేశం గర్వించే స్థాయికి చేర్చింది. //లక్ష్య సాధనలో ‘అగ్రగామి’// 2006లో మొదటి ప్రయత్నంలోనే, దేశంలోనే అత్యంత కఠినమైన యూపీఎస్సీ (UPSC) సివిల్ సర్వీసెస్ పరీక్షలో 56వ ర్యాంకు సాధించి సంచలనం సృష్టించారు. అవహేళనలు చేసిన గొంతులే ఆమె విజయానికి నీరాజనాలు పట్టాయి. ఆ క్షణం ఆమె ఎత్తు 3.5 అడుగులే అయినా, ఆమె కీర్తి హిమాలయమంత ఎత్తుకు ఎగసింది. //సేవా పథంలో విప్లవాత్మక అడుగులు// రాజస్థాన్ క్యాడర్ అధికారిణిగా ఆర్తి గారు చేపట్టిన సంస్కరణలు అజరామరం: బంకో బికానో: బికనీర్ కలెక్టర్గా పనిచేస్తున్నప్పుడు, బహిరంగ మలవిసర్జన రహిత జిల్లాగా మార్చడానికి ఆమె చేపట్టిన ఉద్యమం దేశవ్యాప్త ప్రశంసలు అందుకుంది. //ప్రజాస్వామ్య రక్షణ: // అజ్మీర్ కలెక్టర్గా ఉన్న సమయంలో, దివ్యాంగుల కోసం ప్రతి పోలింగ్ బూత్లో ప్రత్యేక వసతులు కల్పించి, సుమారు 17,000 మంది దివ్యాంగులు తమ ఓటు హక్కును వినియోగించుకునేలా చేశారు. ఈ అసాధారణ చొరవకు గాను ఆమె జాతీయ పురస్కారాన్ని అందుకున్నారు. //మహిళా సాధికారత:// జోధ్పూర్ డిస్కం (Discom) కు మేనేజింగ్ డైరెక్టర్గా బాధ్యతలు చేపట్టిన తొలి మహిళా అధికారిగా చరిత్ర సృష్టించారు. //సందేశం:// "మనిషి గొప్పతనం శరీర వైశాల్యంలో లేదు.. ఆశయాల ఔన్నత్యంలో ఉంది" అని ఆర్తి డోగ్రా నిరూపించారు. నేటి యువతకు ఆమె ఒక నిలువెత్తు స్ఫూర్తి ప్రదాత. విమర్శలను మెట్లుగా చేసుకుని శిఖరాగ్రానికి ఎలా చేరుకోవాలో ఆమె జీవితం మనకు నేర్పుతుంది. //ముగింపు:// ఆర్తి డోగ్రా కేవలం ఒక అధికారిణి మాత్రమే కాదు, అపజయాల సాగరంలో అలసిపోయిన వారికి ఒక ఆశ కిరణం. ఆమె ప్రయాణం అక్షరాల్లో నిక్షిప్తమైన ఒక అద్భుత కావ్యం! మీ రాము కోలా.దెందుకూరు. ఖమ్మం.9849001201.
