నేటి డిజిటల్ యుగంలో, ప్రేమ అంటే తరచుగా సోషల్ మీడియా ప్రొఫైల్స్, ఖరీదైన బహుమతులు మరియు ఇన్‌స్టంట్ రివార్డ్‌లతో ముడిపడి ఉంటుంది. ఇలాంటి ప్రపంచంలో, నిస్వార్థమైన ప్రేమ అనేది పాతకాలపు భావనలా అనిపించవచ్చు. కానీ, హైదరాబాద్‌లో నివసించే ఐటీ నిపుణుడైన శరత్‌ మరియు అతని భార్య ప్రత్యూష కథ, నిజమైన ప్రేమ యొక్క శక్తిని, ఆధునిక ఆశయాలతో మేళవించి, ఎలా నిలబెట్టుకోవచ్చో తెలియజేస్తుంది.
శరత్‌ మరియు ప్రత్యూష ఒక టెక్ సంస్థలో కలిశారు. వారిది సంప్రదాయేతరమైన, వేగవంతమైన ఆధునిక జీవనం. తొలి కలయికలోనే ఒకరంటే మరొకరికి ఇష్టం ఏర్పడింది. ఇరుపక్షాల పెద్దల అంగీకారంతో ఇద్దరూ అగ్నిసాక్షిగా పెళ్ళి చేసుకున్నారు. శరత్‌కు తన కెరీర్, పదోన్నతి, మరియు త్వరగా అమెరికా వెళ్లి స్థిరపడాలనే లక్ష్యం ఉంది. ప్రత్యూష కూడా ప్రతిభావంతురాలైన డెవలపర్. కాకపోతే ఆమె తల్లిదండ్రులు వృద్ధాప్యం కారణంగా అనారోగ్యంతో బాధపడుతున్నారు కాబట్టి ఇండియాలోనే వుండి తన తల్లిదండ్రులకు అండదండలుగా నిలబడాలన్నది ప్రత్యూష ఆశయం. పెళ్లైన కొన్నాళ్ళకు, శరత్‌కు అత్యంత ప్రతిష్టాత్మకమైన కాలిఫోర్నియా ప్రాజెక్ట్‌లో లీడ్‌ రోల్ ఆఫర్ వచ్చింది. ఇది అతని జీవితకాల కల.
ఈ విషయం ప్రత్యూషతో చెప్పినప్పుడు, ఆమె కళ్లలో సంతోషంతో పాటు ఒక చిన్న మెరుపు కూడా కనిపించింది. ప్రత్యూష కొన్ని నెలల క్రితమే తన సొంత సామాజిక కార్యక్రమాన్ని ప్రారంభించింది. ఆమె ప్రాజెక్ట్ పేరు ది స్టూడెంట్ బ్రిడ్జ్. ఇది గ్రామీణ ప్రాంతాల బాల బాలికలకు ఆన్‌లైన్ టెక్ విద్యను ఉచితంగా అందిస్తుంది. ఈ ప్రాజెక్ట్ ఇప్పుడిప్పుడే ఊపందుకుంటోంది.
"ప్రత్యూషా, ఇది నా జీవితాన్ని మార్చేస్తుంది. మనం అమెరికా వెళ్లిపోదాం. నీ ప్రాజెక్ట్‌ను అక్కడి నుంచే రిమోట్‌గా నిర్వహించవచ్చు కదా?" అని శరత్‌ ప్రాధేయపూర్వకంగా ప్రత్యూషని అడిగాడు.
ప్రత్యూష ఆలోచించింది. ఆ ఆఫర్ బాగానే వుంది. అయితే తన కెరీర్ తో పాటు తన తల్లిదండ్రుల బాధ్యత కూడా తనకు ఎంతో ముఖ్యం. వారికి ఈ ప్రపంచంలో వున్నది తను ఒక్కర్తే. వారి అంతిమ దశ వరకు కనిపెట్టుకు వుండడం కూతురిగా తన ధర్మం. "శరత్‌, నేను రిమోట్‌గా నిర్వహించగలను, కానీ ఈ ప్రాజెక్ట్‌కు ఇప్పుడు భౌతికంగా ఇక్కడ నా ఉనికి చాలా ముఖ్యం. ఇక్కడి టీమ్, ఇక్కడి విద్యార్థులు నన్ను నమ్ముకున్నారు. నేను వారికి టెక్నాలజీతో పాటు వ్యక్తిగత ప్రోత్సాహం కూడా ఇవ్వాలి. ఇది నా డ్రీమ్ ప్రాజెక్ట్. పైగా నా పేరెంట్స్ బాధ్యత కూడా నాపై వుంది," అని దృఢంగా అంది ప్రత్యూష.
ప్రత్యూష తన నిర్ణయాన్ని స్పష్టం చేసినప్పుడు, శరత్‌ మొదట్లో అంగీకరించలేకపోయాడు. అతను ఆమెపై కోపం చూపించనప్పటికీ, నిరాశ మాత్రం స్పష్టంగా కనిపించింది. అతని ఐటీ స్నేహితులు కూడా "ఇది నీకు దొరికిన సువర్ణావకాశం. భార్య, పిల్లలు తర్వాత వస్తారు. ముందు కెరీర్ ముఖ్యం. ఇప్పుడున్న ట్రెండ్‌లో ఎవరూ ఎవరి కోసం ఆగిపోవడం లేదు. కెరీర్ కోసమే జీవిత భాగస్వామిని సైతం వదులుకోవడం అనేది నేటి యువతలో కొత్త ధోరణి. నువ్వు వెళ్ళు, తర్వాత నీ భార్యను ఎలాగో మేనేజ్ చేయవచ్చు," అని ప్రేరేపించారు. ఈ సలహాలు అతని స్వార్థాన్ని మరింత పెంచాయి. కానీ, శరత్‌లో అంతర్యుద్ధం కొనసాగింది. ఈ లోకమంతా కెరీర్ కోసం బంధాలను త్యాగం చేస్తున్న తరుణంలో, తాను కూడా అదే చేయాలా? అందువలన తనకు ఒరిగేది ఏమిటి?
అతను ఒంటరిగా కూర్చుని ఆలోచించినప్పుడు, ప్రత్యూష పట్ల ఉన్న గాఢమైన ప్రేమ మేల్కొంది. ఉద్యోగాలు, డబ్బు మళ్లీ సంపాదించుకోవచ్చు, కానీ ప్రత్యూష లాంటి జీవిత భాగస్వామిని, వారిద్దరి మధ్య ఉన్న బంధంలోని నమ్మకాన్ని పోగొట్టుకుంటే తిరిగి సంపాదించలేనని గ్రహించాడు. తన కెరీర్ కోసం తన వైవాహిక జీవితాన్ని, ప్రత్యూష కలలను బలిచేయడం స్వార్థం అవుతుందని అతని వివేకం చెప్పింది.
"ప్రత్యూషా," శరత్‌ ఆమె చేయి పట్టుకుని అన్నాడు, "నా అమెరికా కల నాది. కానీ నీ కల, ఈ స్టూడెంట్ బ్రిడ్జ్ ద్వారా నువ్వు సమాజానికి ఇస్తున్న విలువ, చేస్తున్న సేవ అది మన ఇద్దరి భవిష్యత్తు కంటే గొప్పది. నేను ఈ అవకాశాన్ని వదులుకుంటున్నాను. నీ ఆశయం నా ఆశయం. నీ ప్రాజెక్ట్ ఇక్కడే నిలబడాలి. నేను ఇక్కడే ఉండి, నీకు సాంకేతిక సహకారం అందిస్తాను. ఒక మంచి టీమ్ లీడర్‌గా నేను ఇండియా నుంచే పని చేయగలను."
శరత్‌ నిస్వార్థ నిర్ణయం వల్ల, ప్రత్యూష ప్రాజెక్ట్ మరింత విజయవంతమైంది. శరత్‌ తన సంస్థలో ఇక్కడి నుంచే పని చేస్తూ, ప్రత్యూష సామాజిక సంస్థకు పార్ట్‌ టైమ్ టెక్ మెంటర్‌గా మారాడు. అతను అమెరికా వెళ్లకపోయినా, అతని కృషికి గుర్తింపుగా సంస్థ అతనికి ఇండియాలోనే ఉన్నత పదవి ఇచ్చింది. శరత్‌, ప్రత్యూషల ఉమ్మడి విజయం, వారి నిస్వార్థ బంధానికి ప్రతీకగా నిలిచింది.
ఆధునిక ప్రపంచంలో నిజమైన నిస్వార్థ ప్రేమ అంటే, భాగస్వామి ఆశయాలలో మీ స్థానం ఏంటని అడగకుండా, వారి కలను పూర్తి చేయడానికి మీ స్థానాన్ని త్యాగం చేయడమే.
ప్రేమ అనేది లావాదేవీ కాదు మనం ఇచ్చినదానికి ప్రతిఫలం వెంటనే ఆశించే ఖాతా కాదు. అది ఒక అపూర్వమైన వరం. ప్రేమ అంటే నాకు ఏమి దక్కుతుంది అని అడగడం కాదు, నీకు నేను ఏమి ఇవ్వగలను అని ఆలోచించడమే అసలైన నిస్వార్థం. నిజమైన ప్రేమలో, ఎదుటివారి కలలే నీ కలలవుతాయి. వారి సంతోషమే మన సంతృప్తి అవుతుంది. అక్కడ నేను లేదు, కేవలం మనం మాత్రమే ఉంటుంది.
నేను కంటే నువ్వు గొప్పది, మరియు నువ్వు విజయవంతమైతే, అదే నిజమైన మన విజయం—ఇది కేవలం మానవ సంబంధాలకే కాదు, మెరుగైన సమాజ నిర్మాణానికి కూడా పునాది. ఇతరుల ఆనందమే మన నిజమైన ఆనందంగా మారినప్పుడు, మన జీవితంలోకి వచ్చే సంతృప్తి, ఏ పదోన్నతి లేదా విదేశీ కల ఇవ్వలేని గొప్ప ప్రేరణ అవుతుంది.
