హైదరాబాద్‌ నగరంలో రాజేష్ అనే రియల్ ఎస్టేట్ డెవలపర్ ఉండేవాడు. నిజాయితీతో కూడిన అతడి పనితీరు వల్ల, నాణ్యమైన నిర్మాణాలను అందించడం వల్ల, అతనికి మార్కెట్‌లో మంచి గౌరవం దక్కింది.
రాజేష్‌కు చాలా కాలం తర్వాత ఒకే ఒక్క కొడుకు పుట్టాడు. అతని పేరు అర్జున్. అయితే, దురదృష్టవశాత్తూ, అర్జున్‌కు పుట్టుకతోనే కుడి కాలులో బలహీనత ఉండేది. ఆ కాలు సన్నగా ఉండటం వల్ల సరిగా నిలబడలేకపోయేవాడు. రాజేష్ అత్యాధునిక వైద్య సలహాతో, అతనికి ప్రత్యేకంగా తయారు చేయించిన కార్బన్ ఫైబర్ బ్రేస్‌ ను ఆ కాలుకు అమర్చించాడు. దాని సహాయంతో అర్జున్ నడవగలిగేవాడు, కానీ నడకలో స్పష్టమైన కుంటుతనం మాత్రం ఉండేది.
అర్జున్ ఇంటర్నేషనల్ స్కూల్‌లో విద్యాభ్యాసం మొదలుపెట్టాక, తోటి పిల్లల వేధింపులతో తీవ్రమైన ఆత్మన్యూనత కు గురయ్యాడు. క్లాసులు పెరిగేకొద్దీ తోటి విద్యార్ధులు, టీచర్ల నుండి ఎదురయ్యే వెక్కిరింతలు, హేళనలు, అవమానింపులు వంటివి తట్టుకోలేక నిరాశలోకి కూరుకుపోయాడు.కొంతకాలానికి తన నీదను చూసినా భయపదే స్థితికి అర్జున్ చేరుకున్నాడు.
అర్జున్ నిస్సత్తువను చూసిన రాజేష్, ఈ సమస్యకు పరిష్కారం కోసం తన శ్రేయోభిలాషులను సంప్రదించాడు. ఒక స్నేహితుడు, స్పెయిన్‌లో ఉన్న ఒక అంతర్జాతీయంగా ప్రసిద్ధి చెందిన 'హోలిస్టిక్ వెల్‌నెస్ అండ్ హీలింగ్ సెంటర్' గురించి చెప్పాడు. అక్కడ కేవలం ఆధ్యాత్మిక నమ్మకంతోనే అనేక దీర్ఘకాలిక సమస్యలు పరిష్కారమయ్యాయని చెప్పాడు.
విషయం విన్న అర్జున్, "డాడీ, అసలు ఇలాంటి పూజలు, చికిత్సల వల్ల నా కాలు నిజంగా బాగుపడుతుందా? మీరు ఎంత ప్రయత్నించినా ఇంతవరకు ఫలితం లేదు కదా," అని సందేహంగా, నిరాశగా ప్రశ్నించాడు. కొడుకు తనపై, ఆ వైద్యంపై ఉంచిన విశ్వాసం ఎంత తక్కువగా ఉందో రాజేష్‌కు అర్థమైంది.
రాజేష్ వెంటనే తన ల్యాప్‌టాప్‌లో ఆ సెంటర్‌కు సంబంధించిన ఇంటర్నెట్ సక్సెస్ స్టోరీలను చూపించాడు. "చూడు అర్జున్, ఇది ఎంత గొప్ప కేంద్రమో. దీని వెబ్‌సైట్‌లో ప్రపంచవ్యాప్తంగా, ముఖ్యంగా విదేశాల నుండి వచ్చిన రోగులు ఇక్కడ చికిత్స పొంది ఎలా పూర్తిగా బాగయ్యారో చెబుతున్న వీడియోలు, రాతపూర్వక సాక్ష్యాలు ఉన్నాయి. ఇక్కడికి ప్రముఖులు కూడా వస్తుంటారు. ఈ సమస్య కేవలం శారీరకమైనది మాత్రమే కాదు, మానసికమైనది కూడా. మన ప్రయత్నం మనకు విజయాన్ని ఇస్తుంది," అని చెప్పి, అర్జున్‌లో నమ్మకాన్ని పెంచాడు.
రాజేష్, అర్జున్ తక్షణమే విమానం టికెట్లు బుక్ చేసుకుని, రెండు రోజుల ప్రయాణం తర్వాత స్పెయిన్‌లోని ఆ అంతర్జాతీయ వెల్‌నెస్ సెంటర్‌కు చేరుకున్నారు. అక్కడ కేవలం ఆధునిక వైద్యంతో పాటు, ధ్యానం, యోగా వంటి ప్రకృ తి చికిత్సలను అందిస్తున్నారు. ఇద్దరూ కలిసి ధ్యానమందిరంలో గంటసేపు కూర్చున్నారు.
ధ్యానం ముగించుకుని బయటకు రాగానే అర్జున్ ఆశ్చర్యంగా ఉద్వేగానికి లోనై, "డాడీ! నా కాలులో ఏదో కొత్త శక్తి వచ్చినట్లు అనిపిస్తోంది! ఇకపై నేను సాధారణంగా నడవగలను!" అన్నాడు.
రాజేష్ కొడుకు కాలు వంక చూశాడు. అది యధావిధిగా, సన్నగానే, బలహీనంగా ఉంది.
అప్పుడు అర్జున్ రాజేష్‌తో ఇలా అన్నాడు: "డాడీ, నా కాలు లోపం అలాగే ఉంది. కానీ ఆ ప్రశాంతత వల్ల నయం అయ్యింది నా మనస్సులోని లోపం. ఈ సమస్యను తలుచుకుని బాధపడుతూ, లోపంతో బ్రతుకుతున్నాననే ఆత్మన్యూనతతో కుంగిపోయిన నా మనస్తత్వాన్ని ఆ కేంద్రం సరి చేసింది. ఇతరులు నా నడక గురించి ఏమన్నా నేను పట్టించుకోను. వారిని మరింత ఆత్మవిశ్వాసంతో ఎదుర్కొంటాను. శారీరక వైకల్యం కంటే మానసిక వైకల్యం ఎంతో ప్రమాదకరం అని మా టీచర్ చెప్పిన మాటలు ఇప్పుడు గుర్తుకొచ్చాయి. నా దృష్టి నా లోపంపై కాదు, నా బలాలు, లక్ష్యాలపై ఉంటుంది. చదువులతో పాటు నేను ఇష్టపడే ఈ-స్పోర్ట్స్‌లో కూడా రాణిస్తాను. ఇక నా గురించి మీరు, మమ్మీ ఏమాత్రం బెంగ పెట్టుకోకండి!" అని ఎంతో ధైర్యంగా, ఉల్లాసంగా చెప్పాడు.
కొడుకులోని ఈ పెను మార్పును చూసిన రాజేష్, శారీరక అవిటితనం కంటే మానసిక నిస్సత్తువే ఎంత ప్రమాదకరమో గుర్తించి, తన కుమారుడికి వచ్చిన ఈ ఆత్మవిశ్వాసం అనే గొప్ప వరాన్ని ప్రసాదించిన ఆ అంతర్జాతీయ కేంద్రానికి మనసులోనే కృతజ్ఞతాభివందనాలు తెలియజేసుకున్నాడు. ఆ క్షణం నుండి అర్జున్ ఉత్సాహంగా, సంతోషంగా ప్రవర్తించడం మొదలుపెట్టాడు.
