హైదరాబాద్‌లోని ఒక సామాన్య మధ్యతరగతి ఇంట్లో 17 ఏళ్ల సిరి, తన తండ్రి రాఘవ మధ్య ఉండే అనుబంధం ఆ వీధిలో అందరికీ ముచ్చటగా అనిపిస్తుంది. రాఘవకు తన కూతురే ప్రపంచం, సిరికి తన డాడీయే ధైర్యం; వారిద్దరి మధ్య ఉన్నది కేవలం తండ్రీకూతుళ్ల బంధం మాత్రమే కాదు, ఒకరినొకరు ప్రాణంగా ప్రేమించుకునే అపురూపమైన స్నేహం.

ఒక సాయంత్రం ఇద్దరూ సరదాగా కబుర్లు చెప్పుకుంటుండగా, వచ్చే నెలలో తాను మేజర్ ని అవుతానన్న "డాడీ, నా 18వ పుట్టినరోజు చాలా స్పెషల్ కదా! నాకు ఏం గిఫ్ట్ ఇస్తున్నావు?" అని ఎంతో ఆశగా, ప్రేమగా తండ్రిని చుట్టేసి అడిగింది. ఆమె కళ్లలోని మెరుపును చూసి మురిసిపోయిన రాఘవ, ఆమెను దగ్గరకు తీసుకుని, "గిఫ్ట్ గురించి ఇప్పుడే తొందర ఎందుకు తల్లీ? ఇంకా చాలా సమయం ఉంది కదా! నీ పుట్టినరోజు నాటికి నీ మనసుకి నచ్చే, నువ్వు జీవితాంతం గుర్తుంచుకునే ఒక అపురూపమైన కానుకను అందిస్తాను" అని అపారమైన వాత్సల్యంతో మాటిచ్చాడు. ఆ తండ్రీకూతుళ్ల నవ్వులతో ఆ ఇల్లంతా వెలిగిపోయింది.

కానీ విధి ఆ సంతోషాన్ని చూసి ఓర్వలేకపోయింది. ఆ మధురమైన సంభాషణ జరిగిన కొద్దిరోజులకే, కాలేజీ నుండి నుండి ఇంటికి రాగానే సిరి హఠాత్తుగా చాతి నొప్పితో విలవిలలాడుతూ, ఊపిరి అందక స్పృహ తప్పి పడిపోయింది. ప్రాణానికి ప్రాణమైన కూతురి పరిస్థితి చూసి రాఘవ గుండె చెరువైంది. ఆమెను హుటాహుటిన హాస్పిటల్‌కు తీసుకెళ్లగా, పరీక్షలు చేసిన డాక్టర్లు గుండె పగిలే వార్త చెప్పారు. సిరి గుండె పనితీరు అత్యంత ప్రమాదకర స్థాయికి పడిపోయిందని, తక్షణమే అత్యంత సంక్లిష్టమైన గుండె శస్త్రచికిత్స చేయకపోతే ఆమె ప్రాణాలు కాపాడటం అసాధ్యమని స్పష్టం చేశారు. ఆ మాట విన్న రాఘవ ప్రపంచం ఒక్కసారిగా చీకటిమయమైంది; తన గారాల పట్టిని కాపాడుకోవడానికి ఏ త్యాగానికైనా సిద్ధపడాలనే సంకల్పం ఆ తండ్రి మనసులో అప్పుడే మొదలైంది. కుటుంబ సభ్యులంతా ఒక్కసారిగా దిక్కుతోచని స్థితిలో కుప్పకూలిపోయారు.

హాస్పిటల్ బెడ్‌పై రకరకాల పైపులు, మానిటర్ల మధ్య అత్యంత నీరసంగా పడుకున్న సిరిని చూస్తుంటే ఎవరికైనా మనసు ద్రవిస్తుంది. తన పక్కనే మౌనంగా, కళ్లు తుడుచుకుంటూ కూర్చున్న తన తండ్రి రాఘవ చేతిని గట్టిగా పట్టుకుని, "డాడీ, నేను చనిపోతానా? నాకు చాలా భయంగా ఉంది, నన్ను వదిలేసి వెళ్లవు కదా?" అని ఎంతో అమాయకంగా, ఆర్తిగా అడిగింది. ఆ మాట విన్న రాఘవ గుండె ముక్కలైనా, పైకి మాత్రం చిరునవ్వు నటిస్తూ ఆమెను గట్టిగా హత్తుకున్నాడు. ఆమె నుదుటిపై వాత్సల్యంతో ముద్దు పెట్టి, "లేదు కన్నా, నువ్వు ఖచ్చితంగా బ్రతుకుతావు.. నీకేం కాదు. నీ ప్రాణం కంటే ఈ లోకంలో నాకు ఏదీ ఎక్కువ కాదు, నీ కోసం నేను ఏదైనా చేస్తాను" అని కొండంత ధైర్యం చెప్పాడు. కన్నీళ్లు ఆపుకోలేక వేగంగా గది బయటకు వెళ్ళిపోతున్న తండ్రిని చూసి, "నువ్వు అంత నమ్మకంగా ఎలా చెప్పగలవు డాడీ?" అని సిరి వెనుక నుండి పిలిచింది. రాఘవ గుమ్మం దగ్గర ఆగి, వెనక్కి తిరిగి చూసి, తడి కళ్లతోనే "నాకు తెలుసు తల్లీ, నీ డాడీ నీకు ఇచ్చిన మాట ఎప్పుడూ తప్పడు" అని గంభీరంగా చెప్పి భారమైన అడుగులతో అక్కడి నుండి వెళ్ళిపోయాడు. ఆ క్షణంలో అది వారిద్దరి మధ్య జరిగిన చివరి సంభాషణ అని, ఆ మాట వెనుక ఎంతటి గొప్ప త్యాగం దాగి ఉందో ఆ చిన్నారి సిరి ఊహించలేకపోయింది.

కొన్ని రోజుల తర్వాత సిరికి అత్యవసరంగా గుండె మార్పిడి సర్జరీ జరిగింది. అది ఒక అద్భుతంలా విజయవంతం కావడంతో ఆమె మెల్లమెల్లగా కోలుకుని పూర్తి ఆరోగ్యంతో సరిగ్గా తన 20 వ పుట్టినరోజు నాడే ఇంటికి తిరిగి వచ్చింది. కానీ ఇంట్లో అందరూ కళ్లు తుడుచుకుంటూ కనిపించడం, తనని ఎంతో గారబం చేసే డాడీ ఎక్కడా కనిపించకపోవడం ఆమెకు ఆశ్చర్యం, ఆందోళన కలిగించింది. తన గదిలోకి వెళ్లగానే బెడ్‌పై ఒక అందమైన కవరులో లెటర్ కనిపించింది. అది తన డాడీ రాసిన చివరి ఉత్తరం. అందులో ఇలా ఉంది: "నా బంగారు తల్లి, నువ్వు ఈ లెటర్ చదువుతున్నావంటే, నేను చెప్పినట్టే అంతా మంచే జరిగిందని అర్థం. గుర్తుందా? వచ్చే బర్త్‌డేకి గిఫ్ట్ ఏం ఇస్తావని నన్ను అడిగావు. ఆ రోజు నాకు తెలియదు కానీ, ఇప్పుడు నా దగ్గర నీ కోసం ఒక అసాధారణమైన కానుక ఉంది. ఈ అందమైన ప్రపంచాన్ని ఇంకా చాలా కాలం చూడటానికి నేను నీకు నా 'గుండె'ను గిఫ్ట్‌గా ఇస్తున్నాను. ఈ గుండె నీలో కొట్టుకున్నంత కాలం నీ డాడీ నీలోనే ఉండి నీ ప్రతి అడుగును గమనిస్తూనే ఉంటాడు. పుట్టినరోజు శుభాకాంక్షలు అమ్మా!ఈ రోజు నువ్వు మేజర్ వి అవుతున్నావు. జీవితం అంతా బాధ్యతగా, అన్ని సుఖ సంతోషాలను అనుభవిస్తూ నిండు నూరేళ్ళు చల్లగా బ్రతుకు తల్లి "

సిరి కళ్లు వర్షించాయి. తన ప్రాణాలను నిలబెట్టడానికి తన తండ్రి తన ప్రాణాలనే త్యాగం చేశాడని తెలిసి ఆమె మూగబోయింది. తన తండ్రి ప్రేమ ముందు తను కోరుకున్న బొమ్మలు, బట్టలు ఎంత చిన్నవో ఆమెకు అర్థమైంది. తల్లిదండ్రుల ప్రేమ ఎంత నిస్వార్థమైనదో, బిడ్డల సంతోషం కోసం వారు ఎంతటి ప్రాణ త్యాగానికైనా వెనకాడరని ఈ కథ మనకు గుర్తు చేస్తుంది. మనల్ని రక్షించడానికి వారు లోలోపల ఎంత సంఘర్షణ అనుభవించారో, మన క్షేమం కోసం ఏమేం కోల్పోయారో మనకు ఎప్పటికీ పూర్తిగా తెలియకపోవచ్చు. అందుకే మనల్ని నీడలా కాపాడే తల్లిదండ్రులను ఎల్లప్పుడూ గౌరవించాలి మరియు ప్రేమించాలి.